Nos en fotèm plan de lor granda consultacion sus l’identitat nacionala francesa, sèm occitans nosaus ! La pròva en imatge :

Se pòt véser en mai bèl, e se comandar sul siti de l’Estampariá Nacionala.

(bon, vos devi encara contar las manifestacions de Carcassona e Parpinya amb de fòtos… lèu-lèu, promés !)

Val mai tard que jamai… a 31 ans, soi inscrita dins una universitat de l’ensenhament public francés !

Ièr anèri al Miralh per « l’inscripcion administrativa », e ben… per les que capitan a s’inscrire, lor caldriá validar una UE* sonque per lor coratge ! ^^ Les papièrs de la Secu e de la Caf son de melhor entressenhar que lor formunari ! (Bon, rai, aquò, es fait ! )

Dins la coa, i aviá la Sofía qu’esperava son torn tanben. Avèm passat un pichot moment a parlar, ela de sa licéncia, ieu de mon DU, d’estudis, que ! De tot e de res. Un còp son torn arribat, aussiguèri dins la coa, a baissa votz « on est tombés avec les occitanistes ». Bon, la pròva (mercés al metrò ?) que las gents sabon ara quina lenga es ! Mas çò estranh, es que passan lor temps a dire que l’occitan s’ausís pas jamai per carrièra a Tolosa, mas se le parlam, sèm pas de simplas occitanoparlantas, sèm d’« occitaniastas » ! Coma s’èrem a parlar de pausar de bombas dins la fac ! Tsss…

Bon, mon torn arribat, decubriguèri que m’an validat (amb l’equivaléncia de l’IEO) non pas 2 UE coma cresiái mas 3 (sus 4). Le DU es fait de 4 UE, 3 de lenga, 1 de civilisacion ! Ben me demòra pas que la de civi ! (çò que veniái cercar a la fac, un complement cultural a mon aprentissatge de la lenga). Doncas 4 oras de cors per setmana, que començaràn en febrièr (2nd semèstre). Vos contarai le contengut dels corses…

Un còp tot acabat, te balhan una carta d’estudiant tota novèla, amb una puça magnetica (per la BU** et autres…), e un Monéo dessus per te pagar le resto U ! E ben…

*Unitat d’Ensenhament, per les que son pas acostumats —coma ieu !— al « jargon » universitari !
** Biblioteca Univesitaria ________

Ligam : L’occitan a l’Universitat de Tolosa le Miralh

Me veni de crompar un apartament a Tolosa. I somiavi dempuèi un fum de temps : aver un niu a ieu ! Per ieu que fa… macarel, 12 ans que demòri a Tolosa (1 an per pèrla de la crotz, tot un cicle, que !) e que soi amorosa de ma vila, es un bonur !

Ara, es bon, ai las claus dempuèi una gròssa setmana, es un 33m2 (32,98 Carrez se vos plai !) Es a Marengo, a costat de la Mediateca, amb un pichon balcon, et una cambroneta, que un còp que i aura un lèit e un armari dedins, serà pas possible d’i marchar ! Mas bon, es una pèça per dormir (o autre, mas pas per i faire un footing !)

Coma me disiá la maire le jorn de la signatura « mon veire es pichon, mas es le miu ! »

la pèça màger, plena de solelh, a man dreita la pòrta que dubra sul balcon, al fons la cambreta, a man esquerra l'anciana cosina que se vètz pas, soi a la pòrta de dintrada

I a de trabalhs de far dedins, coma la cosina, de tornar faire cap e tot, n’i aviá una mas pas brica optimisada per un pichon espaci, es que me cal dintrar un sejorn canapè/taula baissa e un canton burèu per i trabalhar, tanben !

Doncas fa una setmana e mièja que l’amorós e ieu i sèm cada jorn, e n’avèm encara per un brave temps ! El, es partit a far tot le rendut-compte dels trabalhs sul siu blòg, podètz seguir tot aquò aquí : http://einucent.wordpress.com/category/brico

A lèu-lèu, quora aurai le temps/l’energia de vos tornar esciure !

Per les que son pas a Tolosa e que son curioses de las anonças vocalas d’estacions en occitan (en mai del francés) soi anada far una presa de son dins lo metrò amb mon telefonet ! I a pas que la linha A per manca de bateria, mas vos donarà ja una idèa ! Ensajarai de far çò meteis dins la linha B se n’ai léser, perque amb mon desmenajament qu’aprocha, res es pas mens segur ! ^^

(nòta : me ne manca un trocinet : « Prochaine station Argoulets – Los argolets »)

I a una parisenca que tota fashionista coneis plan : Sonia Rykiel. Pas besonh de li faire mai de pub, ven del « quartier latin » (qu’a pas grand causa de latin, ieu tròbi, quora m’i passeji…) e s’es fait un nom subretot per sas raiaduras de negre e color. L@s d’entre vosaus qu’an l’èlh per la mòda, avètz ja vist un fum de còps aquelas raiaduras, dempuèi d’annadas, sus las femans, dins las botigas… e mèfi, qu’es car tot aquò ! Tot le monde ne se pòt pas crompar ! Plan coneguda ara, la dòna a re-dessenhat la botelha de Suze a sas colors…

De costuma, soi pas afogada de raiaduras, me remembra tròp l’esperit marinière. Mas aquela mòda plan colorada, amb le negre per sostenir la color, m’agrada ben. Çaquelà, me fa mai pensar a un esperit de mòda « latin », justament… Cal pas oblidar que les grands noms de la nauta-cordura que botan le mai de color dins lors creacions son d’en çò nòstre (Cacharel, Christian Lacroix), es una expression qu’auriái mai vista sus una marca de la Mediterranèa.

Mon idèa èra pas fòla, descubrèri i a pauc de temps una marca del canton de Montpelhièr, « Little Marcel », que fan vertadièrament de tot, amb las famosas raiaduras (adaptadas a la lor colleccion !), d’autras tanben, de colors mai suavas, per femna, per la plaja, per òmes e dròlles… a un prètz qu’es pas complatament fòra-rason !

An tant de succès que la del nòrd, al mens al país, benlèu perque las gents i tròban de causas que pegan mai a la lor vida vidanta (platja, vestit per la calor) e que se pòdon pagar. Lor disi òsca. D’autres lor reprocharan benlèu de copiar, ieu i vesi coma un « contest », quicòm de la mena « nosaus tanben podèm, en melhor, e per las gents d’en çò nòstre », sens cap de costat elitista. Es pas « ensajar de faire coma a París », mas « nos reconeissèm dins aquò, o anèm faire puslèu que de daissar le mercat liure al parisencs » ! Mas bon, es mon sol vejaire, benlèu serètz pas d’acòrdi !

S’aquò vos parla tanben, anatz faire un torn sur la lor botiga en linha : http://boutique.littlemarcel.com, ieu èri un pauc perduda dins las talhas, respondan als mails dins la jornada >> XS = 1 = 36, S = 2 = 38, M = 3 = 40, L = 4 = 42.

Per acabar, ensaji dins aquela rubrica de vos presentar la mòda pel biais siá de marcas de vestits occitans, siá de marcas que, sens se dire occitanas, son del país. Per veire çò que se pòt preferir, quora òm a enveja de se crompar de vestits, perque es fait en çò nòstra. Perque se volèm que l’argent, que les emplecs demòren al país, cal començar per gaitar, coneisser çò que se fa aquí. Ensaji de destriar las marcas del territòri occitan, senon catalan, o las dels amics, per aprene a virar les èlhs de París, per gaitar endacòm mai. La descolonisacion es d’en primèr dins le cap ! E tot aquò perque volèm viure e decidir al país* ! Volèm èstre polits-das al país !

E ben i cresiái pas… E ben o van faire !

© carta postala Convergéncia Occitana

De qué parli ? De las anonças oralas en occitan dins le metro de Tolosa ! Per una suspresa, es una de las bonas !

Çò ditz La Dépêche :
Les annonces des stations vont se faire en français et occitan dans le métro toulousain pour le festival Occitania. Et elles seront maintenues.
(Las anonças de las estacions se van faire en francés coma en occitan dins le metro tolosenc pel festenal Occitània. E seran mantengudas.)

Sabi pas qual i es per qué dins aquel afar, mas le(s) merceji plan ! Me sembla interessant per mantunas rasons :

• es l’escasença de far ausir a las gents de Tolosa la lenga del país, e aquò’s pas res ! Tolosa va tornar prene sa dimension de vertadièra ciutat occitana, jos la tèrra pel moment (!) mas qual sap de l’avenidor ?
• las autras vilas van poder demandar çò meteis, arguissent « mas a Tolosa, l’an, elis, perqué pas nosaus ? »
• e, darrièr punt que me sembla màger, per ieu, de las demandas, accions, en favor de la lenga, me semblaba la mens probable qu’abotiguèsse. Doncas, anèm poder demandar un fum de causas « mens gròssas » (daissem parlar la nòstra imaginacion…), totjorn en podent dire « mas i a ja le metro, alavetz perqué pas … e …, e tanben … ? é ? perqué pas ?

L’imaginacion al poder !
La lenga de pertot !

Tolosa t’aimi ! Per Tolosa, totjorn mai* !

Legir l’article de La Dépêche (clic)

* Devisa oficiala de la vila de Tolosa, pas jamai cambiada/revirada en francés.