La brava secretària de la fac !

Jos-títol : Universitat de Tolosa Lo Mirailh II

Omenatge a ma co-bloguitjairitz Parpalhon…

Uèi, soi tornada a la fac m’entressenhar, per le quatren còp… (smiley que n’a pro…)

Dintrèri, la secretària (qu’es novèla a l’URF d’occitan, e qu’i coneis pas res, es ela que l’a dit le darrièr còp quand foguèt dins l’impossibilitat de m’entressehnar, e deviá me telefonar per me dire tot, un còp que sauprà), m’aculhiguèt…

Li diguèri « soi venguda i a doas setmanas per m’entressenhar sul DUEPL d’occitan…
— Òc, me remembri », me respondèt, tota vergonhosa de m’aver pas telefonat : « desolada… —se repren— voliatz saber… blabla… blabla… ? »

Alavetz, m’a tot copiat, corrissent de corredor en corredor per me trapar lo programa, les oraris, e me balhèt un dossièr d’inscripcion (que normalament se deu anar cercar le 29, mas li ai dit que podrai pas). Foguèri mas que plan recebuda !

Se i aviá una morala a n’aquela istòria, seriá : la vergonha dels uns fa l’astre dels autres !

(fin finala, après una lectura plan aprigondida de la documentacion… mmh… cossí dire ? soi pas qu’una canharda qu’aimi pas se levar d’ora le matin, mas… cresi que lo Godolin a ganhat una escolana)

❦